សមាជិកកងចល័តនារី
(ស្វាយរៀង) ៖ សេក សាម៉េត មានអាយុ៦៨ឆ្នាំ ជាកសិករ រស់នៅភូមិសាលារៀន ឃុំបាសាក់ ស្រុកស្វាយជ្រំ ខេត្តស្វាយរៀង។ សាម៉េត មានបងប្អូនប្រាំមួយនាក់គាត់ជាកូនទីបីក្នុងគ្រួសារ។
នៅសម័យ លន់ នល់ សាម៉េត រស់នៅស្រុកកំពង់រោទិ៍ ខេត្តស្វាយរៀង។ គាត់បានឃើញក្នុងភូមិមានសង្រ្គាម មានយន្តហោះទម្លាក់គ្រាប់ ទាហានចាប់រំលោភស្រ្តី និងប្លន់ទ្រព្យសម្បតិ្តប្រជាជន។
ក្នុងរបបខ្មែរក្រហម សាម៉េត បានមករស់នៅភូមិសាលារៀន។ ពេលនោះអង្គការបានប្រកាសឲ្យប្រជាជនទាំងអស់ត្រូវប្រមូលទ្រព្យសម្បត្តិឯកជន និងសត្វពាហនៈមកទុកក្នុងសហករណ៍សម្រាប់ប្រើប្រាស់រួមគ្នា។
ក្នុងសហករណ៍ភូមិសាលារៀន សាម៉េត ធ្វើការនៅក្នុងក្រុមកងចល័តនារី ដែលមានសមាជិក១២នាក់ ត្រូវ ជីកប្រឡាយ លើកភ្លឺស្រែ លើកទំនប់ និងធ្វើស្រែ។ គាត់ត្រូវទៅធ្វើការពីម៉ោងប្រាំពីរព្រឹក រហូតដល់ម៉ោងប្រាំល្ងាច។ ក្នុងមួយថ្ងៃគាត់ទទួលបានរបបអាហារពីរពេលដែលអង្គការបានកំណត់ម្នាក់ពីរវែក និងសម្លត្រកួន ត្រគៀត និងដើមចេក។ របបអាហារនេះមិនគ្រប់គ្រាន់ទេ សាម៉េត ត្រូវលួចបេះបន្លែ និងស្លឹករុក្ខជាតិផ្សេងៗហូបបន្ថែមពេលទៅធ្វើការ។
សាម៉េត៖ «ខ្ញុំឃើញស្រូវធ្វើបានផលច្រើន និងបានរក្សាទុកក្នុងសហករណ៍។ ឡានធំៗ ដែលមានឃ្លុបបិទជិតៗចូលមកដឹកស្រូវស្ទើរតែអស់ពីឃ្លាំងជាហេតុនាំឲ្យប្រជាជនគ្មានរបបហូបគ្រប់គ្រាន់»។
សាម៉េត បានបន្តថា ទោះបីប្រជាជនហូបមិនឆ្អែតក៏មិនអនុញ្ញាតឲ្យនិយាយការពិត ហើយប្រសិនបើអង្គការដឹងប្រឈមមុខយកទៅសម្លាប់ចោល។
បន្ទាប់មក សាម៉េត ត្រូវបានអង្គការផ្លាស់ឲ្យទៅធ្វើស្រែនៅសមរភូមិបន្លាស្អិតនៅជិតតំបន់ព្រំដែន។ ពេលនោះវៀតណាមបានមកធ្វើស្រែនៅតំបន់នោះ ខ្មែរក្រហមឲ្យគាត់ និងប្រជាជនទៅធ្វើស្រែគឺក្នុងគោលបំណងដើម្បីការពារទឹកដី។ នៅពេលគាត់កំពុងធ្វើការវៀតណាមបានផ្លោងគ្រាប់បែកបណ្តាលឲ្យស្លាប់យុវជនបីនាក់ សាម៉េត និងយុវជនបួននាក់ផ្សេងទៀតបានរងរបួស។ អង្គការបានបញ្ជូនគាត់ និងអ្នករងរបួសទៅសម្រាកពេទ្យ។ ព្យាបាលបានប្រហែល២០ថ្ងៃ សាម៉េត បានសុំអង្គការទៅធ្វើស្រែវិញព្រោះអំឡុងពេលនៅសម្រាកពេទ្យគាត់ទទួលបានរបបអាហារតិចជាងពេលទៅធ្វើការ។
បន្ទាប់មកនៅឆ្នាំ១៩៧៨ អង្គការបានជម្លៀស សាម៉េត ឲ្យទៅស្រុកកៀនស្វាយ ខេត្តកណ្តាល។ នៅទីនោះអង្គការបានចោទគាត់ និងប្រជាជនមកពីខេត្តស្វាយរៀងថា «ពួកបូព៌ា ក្បាលយួន និងខ្លួនខ្មែរ»។ គាត់ត្រូវច្រូតស្រូវ កាប់ដើមទន្ទ្រានខេត្ត និងអាចម៍គោយកមកលាយធ្វើជីទុកដាក់ស្រូវ។ សាម៉េត រស់នៅទីនេះរហូតដល់របបខ្មែរក្រហមបានដួលរលំ។
នៅស្រុកកៀនស្វាយ សាម៉េត បានឃើញអង្គការចងដៃមនុស្សទៅក្រោយនាំទៅសម្លាប់ដោយសារប្រជាជនបានតវ៉ាប្រឆាំងការដឹកនាំរបស់ខ្មែរក្រហម។
ពេលតំបន់ សាម៉េត រស់នៅត្រូវបានរំដោះ គាត់បានត្រឡប់មករស់នៅខេត្តស្វាយរៀងរហូតដល់សព្វថ្ងៃ។
សម្ភាសន៍ដោយ ពេជ សាន ថ្ងៃទី១៦ ខែសីហា ឆ្នាំ២០២១
អត្ថបទដោយ អេង សុខម៉េង ថ្ងៃទី២៧ ខែកញ្ញា ឆ្នាំ២០២៤